咱來讀讀

01｜恩典

有聲朗讀：https://youtu.be/TodkDpvBPX8

　　頂禮拜拄歇寒的第二工，我參加阮縣市辦的一个閩南語親師生的研習。辦這个研習會，上主要的目的是希望老師、家長會當陪囡仔做伙來學閩南語的字音字形。佇阮的課程內底，免不了有一寡讀抑是練閩南語音字的感想佮撇步。講來嘛好耍，所有共閩南語字音字形練甲有程度的人，攏有做一件看起來可能會予人感覺痟痟的代誌，就是讀辭典。
　　我少年讀外文系的時，有人講英語若欲好，著愛背英語字典。我想講「頭毛搵澹，無洗袂使」，既然我都咧讀外文系矣，上無嘛愛「攑香綴拜」試看覓，看敢會變甲較厲害。毋過，可能我下的工夫無夠在，對英語的感情猶無夠出來，到尾來，我的結論是：痟的毋才會共辭典背起來。
　　想袂到我這馬痟臺語辭典痟甲遮厲害。我自重接觸臺語以來，竟然是《台語詞典》、《華台語對照典》、《台灣諺語典》𢯾咧，一字一字讀。是真正自頭到尾當做百科冊認真讀，毋是干焦掀掀咧查資料爾喔！我是愈讀愈歡喜，愈讀愈趣味，愈讀愈感覺為閩南語拍拚有意義，愈讀愈感恩世間竟然有人願意嘔心血出辭典，保留咱的音字。也發覺原來讀辭典是一種愛，一種支持。
　　語言是民族的寶貝，向望逐種語言攏會當受尊重，會當互相欣賞，會當代代使用。因為尊重語言的使用就是有人權的修養；欣賞語言的多元才算有國際化、本土化的圓滿；共家己的母語盡量講出來、寫出來，就是一種無分宗教對土地的愛。毋管學佗一種語言，攏愛感「恩」有辭
「典」，簡單來講就是「恩典」啦！

【語詞註解】
1. 一寡：tsi̍t-kuá，一些。
2. 撇步：phiat-pōo，好方法、捷徑。漂亮的手段、高明的方法。
3. 好耍：hó-sńg，好玩、有趣。
4. 痟痟：siáu-siáu，有點瘋狂。
5. 頭毛搵澹，無洗袂使：Thâu-mn̂g ùn tâm, bô sé bē/buē-sái/saih. 頭髮
沾溼了，不能不洗。形容事情已開始，不得不繼續下去。
6. 攑香綴拜：gia̍h-hiunn-tuè/tè-pài，拿香跟著拜，比喻有樣學樣。
7. 在：tsāi，穩固。
8. 重：tîng，重新、再次。
9. 𢯾咧：mooh--leh，緊抱著（東西或人）。
10. 嘔心血：áu-sim-hiat，嘔心瀝血、用盡心力。

【問題討論】
1. 你上想欲感恩的人、事、物是啥物？為啥物？
2. 你敢捌參加過啥物研習抑是活動？有啥物特別的記持佮感想？
3. 你較佮意紙本的臺語辭典抑是線頂的辭典？為啥物？
4. 你敢會曉查教育部常用詞辭典？你查過啥物？你想欲查啥物？

///////////////////////////////////

02｜同窗

有聲朗讀：https://youtu.be/k9gasTrVluM

　　「你攏無變！」「你嘛無變！」「有啦，生兩个矣，變較闊。」「哈！我嘛有啦！變較媠。」二十外冬無相見。高中時期的同窗和我三个人，你一句，我一句。開始滾耍笑了後，時間若像飛轉去阮高中同窗讀冊，做伙講趣味的時。
　　時間咧變，朋友的感情無變。這二十外冬來，毋是無去思念𪜶，是逐擺攏規工無閒了、欲睏的半暝，孤一个人坐佇窗邊寫日記咧想𪜶。阮三个姊妹仔伴，一个留佇下港拍拚，一个獨身走國內國外，一个嫁雞綴雞飛、嫁狗綴狗走，對下港來到臺北城。早前無利便的高鐵，見面比登天閣較難；有高鐵了後，嘛揣無逐家攏有閒的好時機。就按呢，一工過一工，一暝過一暝，三个好朋友，七撨八撨，撨二十外冬，才撨著這个做伙見面的機會。閣毋敢出來耍傷久，干焦耍拜六、禮拜兩工。當年無煩無惱的青春少女，這馬變做為家庭、為囝兒咧操煩的老母。講到遮，恁應該就理解矣，阮毋是無時間，實在是逐家無才調放囝、放翁，逐家攏咧等囡仔大漢。
　　阮三个對中晝見面開始，喙無停過，暗時閣約去蹛佇新北投山頂的大飯店，阮共窗仔開開，那看淡水河山海共天的景緻，那看城市的燈火閃閃爍爍。講未來、講過去，講甲半暝。隔轉工，阮過淡水去三芝，雨鬚綿綿，櫻花滿枝。食中晝飽，踅去石門，揣一間倚海邊、會當吹海風的店啉咖啡。阮揣一位向海的窗仔邊，昨暗阮三个同窗佇窗邊共看城市的閃爍，今仔日阮仝款佇窗邊咧欣賞海湧行上海墘。天地遮爾闊，有緣同窗，有緣相逢，有緣佇通透的窗邊鼻苦味仔苦味的咖啡，心內煞感覺芳甜仔芳甜。

【語詞註解】
1. 媠：suí，漂亮、美麗。
2. 外：guā，放在數字之後表示「餘」、「多一點」。
3. 滾耍笑：kún-sńg-tshiò，開玩笑。
4. 欲睏：beh khùn，即將就寢。
5. 姊妹仔伴：tsí-muē/buē/muāi-á-phuānn，手帕交、姊妹淘。指一群情同姊妹、互相為伴的朋友。
6. 獨身：to̍k-sin，單身。
7. 就按呢：tsiū/tsū-án-ne/ni，就這樣子、因此、所以。
8. 撨：tshiâu，商討、商議。
9. 無才調：bô-tsâi-tiāu，沒辦法。
10. 蹛：tuà，居住。

【問題討論】
1. 你敢有感情較好的同窗好朋友？恁攏做伙做啥物代誌？
2. 你敢有蹛飯店的經驗？有啥物特別的記持？
3. 你感覺好朋友的定義是啥？為啥物？

///////////////////////////////////

03｜阿母逐日

有聲朗讀：https://youtu.be/ePdpIlSRq2k

　　古早有一个叫做夸父(Khua Hū) 的人，看日頭赤焱焱，共土地曝甲焦焦焦，逐家袂當作穡，無收成，日子袂快活；伊就無顧性命，咒誓講欲去逐日頭，欲叫日頭毋通傷焱，予逐家日子好過、心內無驚惶。伊盤山過嶺，無暝無日無停跤，逐九暝九日猶是逐袂著日頭。尾仔傷忝矣，煞犧牲性命。逐擺看著這个故事，明明知影逐日頭是戇代誌，毋過伊勇敢犧牲的精神予我誠感動。
　　為逐家犧牲、逐日頭的英雄，毋是干焦男性；阮兜這棟大樓，就有一陣犧牲青春、逐日頭的女性。毋過，𪜶袂嫌日頭傷大，𪜶是驚日頭無夠大。
　　日頭若出來共雲尪掰開，阮這棟大樓的阿媽、阿桑就有夠歡喜，因為燒烙的日頭毋但予人有元氣（giàn-khì），嘛會予衫焦焦焦無溼氣，鼻著有芳味，穿著健康食百二。南部的鄉親可能無法度理解北部人對日頭的相思。寒天的臺北欠日頭，閣較僥倖的是定定落雨，無一日好天，收衫的時定定起懷疑：是拄才洗好是毋是？
　　阮兜蹛電梯大樓，露台才一敉敉，披衫已經無夠四序，若數想欲會通風、有大日頭，袂輸戇人練戇話，枵狗望西施。就因為按呢，透早一下看著出日頭，遮的為家庭犧牲、做人阿母的女性，攏嘛開始逐日頭。先拚勢操洗衫仔機，一籠洗比一籠較滇，樓頂樓跤走來走去，趕欲佇日頭落山進前，曝鞋、曝衫、曝被單。𪜶勇敢為家庭犧牲的精神嘛予我誠感動。
　　若拄著歇睏日閣好天，我嘛會綴𪜶逐日頭，因為我有想欲予囡仔健康的堅持，因為我思念故鄉規年迵天攏是好天，我會想起衫予日頭曝焦了後的芳味。彼種芳味，有阿母疼惜囝兒的記持。我的查某囝啊……，有一工，恁若離鄉去別个城市，無阿母佇恁身軀邊，恁敢會看著日頭，想起阿母逐日？

【語詞註解】
1. 日頭赤焱焱：ji̍t-thâu tshiah-iānn-iānn，太陽很大，陽光很強。
2. 作穡：tsoh-sit，從事農務。
3. 咒誓：tsiù-tsuā，發誓、立誓。
4. 驚惶：kiann-hiânn，驚慌、驚恐。
5. 掰開：pué--khui，撥開。
6. 僥倖：hiau-hīng，可憐、慘。
7. 露台：lōo-tâi，陽台。
8. 四序：sù-sī，井井有條、妥當。
9. 戇人練戇話：gōng-lâng liān gōng-uē，痴人說夢。
10. 規年迵天：kui-nî-thàng-thinn，一整年。

【問題討論】
1. 你佮意好天抑是落雨天？為啥物？
2. 恁兜佇佗位曝衫、曝被？為啥物？
3. 你印象上深恁阿母為厝裡做的家事是啥？你想欲共伊講啥？
4. 你會當為恁兜做的代誌是啥？為啥物？

///////////////////////////////////

04｜阿媽種菜

有聲朗讀：https://youtu.be/ci0hJUDQTts

　　「阿媽」這个詞是咱臺灣話內底對年歲較有的查某人的稱呼。毋管是家己的內媽、外媽，厝邊隔壁看起來年歲有夠的阿媽，抑是路裡問路、無熟似、別人的阿媽，只要共對方的年歲相（siòng）予好，毋通共小姐看做阿婆，「阿媽」兩字一下講出喙，司奶也好，尊重也好，相借問也好，聽著的人總是歡歡喜喜笑微微。
　　失禮啦！我毋捌看過阮阿媽種菜！阮內媽葉見是高雄中洲仔葉家喝水會堅凍的大小姐。聽講伊做人誠好，逐擺轉外家的時，逐家對巷仔頭到大廳排列咧歡迎伊，中晝頓閣搶欲共請。大小姐毋免買菜，嘛毋免煮菜就有通食，哪著種菜？阮外媽佮阮外公，自阮老爸過身了後，對嘉義的庄跤搬來佮阮做伙蹛，共阮阿母鬥顧四个幼囝；大都市欲蓄田種作較僫，所以我有定定看著阮外媽去買菜，毋捌看過伊種菜。
　　阮這馬的厝邊有幾若个阿媽有咧種菜。有一个是80 歲猶足勇健，定定看伊沿駁岸，手捾拄對菜園仔現挽的菜轉來。我逐擺看著伊，遠遠就會擛手叫伊阿媽，伊足歡喜的。我感覺老人囡仔性，需要人惜，需要人佮伊開講做伴。可能是我好笑神得人疼，有一擺伊講伊有加挽寡，硬欲拜託我共鬥食。另外一个我攏叫伊少年阿媽，逐工踏伊的oo-tóo-bái去貓空（Niauh-khang）的山頂種菜。定定嘛看著伊的機車若中盤的菜車，載十項八項，不時都那和厝邊開講那共菜送人。閣有一个較有生理頭殼的阿媽，家己種菜家己食，賰的就俗俗仔賣予厝邊隔壁，半賣半相送。伊種菜掛運動，趁一寡四秀仔錢趣味趣味。遮的阿媽攏足古錐。
　　十冬前，我數想欲做都市農民，假日就去山頂稅一角仔所在種菜。真正足艱苦呢！愈種愈欽佩逐工去巡田園、種菜的阿媽，愈來愈感謝𪜶共無偌濟的收成分我食，共我當做家己的孫仔咧疼。誠歹勢，我這个假農民食頭路傷無閒，有去種作，無去收成，誠拍損。後來猶是殘殘決定暫時像阮外媽會曉買菜就好矣！是毋是食老較閒做阿媽會去種菜，以後才便看。

【語詞註解】
1. 看做：khuànn-tsò/tsuè，看成。
2. 司奶：sai-nai，撒嬌。恣意做出嬌態以博得對方的寵愛。
3. 相借問：sio-tsioh-mn̄g，打招呼、寒暄。互相打招呼問候。
4. 喝水會堅凍：huah tsuí ē kian-tàng，說話很有份量。
5. 轉外家：tńg guā-ke，回娘家。
6. 蓄田：hak-tshân, 買田地。
7. 駁岸：poh-huānn，堤防、河堤。
8. 中盤：tiong-puânn，批發商。
9. 拍損：phah-sńg，可惜。
10. 便看：piān-khuànn，看情形、看形勢。

【問題討論】
1. 恁兜敢有家己種菜？若有，請講出你的經驗。若無，請講出原因。
2. 你的內媽佮外媽有啥物無仝？請用實際的例說明。
3. 你若有種菜，你想欲種啥物菜？你會按怎處理你的收成？
4. 你敢捌佗一个「有特色的阿媽」？伊有啥物特別的所在？

01｜恩典

有聲朗讀：https://youtu.be/TodkDpvBPX8

　　頂禮拜拄歇寒的第二工，我參加阮縣市辦的一个閩南語親師生的研習。辦這个研習會，上主要的目的是希望老師、家長會當陪囡仔做伙來學閩南語的字音字形。佇阮的課程內底，免不了有一寡讀抑是練閩南語音字的感想佮撇步。講來嘛好耍，所有共閩南語字音字形練甲有程度的人，攏有做一件看起來可能會予人感覺痟痟的代誌，就是讀辭典。
　　我少年讀外文系的時，有人講英語若欲好，著愛背英語字典。我想講「頭毛搵澹，無洗袂使」，既然我都咧讀外文系矣，上無嘛愛「攑香綴拜」試看覓，看敢...

家己講對你講

　　先來講冊名《咱來讀讀》，「咱」較親切，「來」是招你做伙，「讀讀」是用文白音的趣味講文章的來源佮期待。這本冊有我五冬56 篇教育部電子報「愈讀(tha̍k) 愈捌臺語( 閱讀越懂閩客語)」的專欄文章，有十二冬16篇全國語文競賽「閩南語朗讀(tho̍k)」的文章，閣有幾若篇我50 歲以後讀世間、看人生的短文。
　　毋管你幾歲，攏通輕鬆自在來讀這本冊。雖然文章有新有舊，毋過綴年歲我有成長，當初無夠幼路的想法佮語句攏閣共斟酌過，逐篇嘛共修予平均八百字長短，攏一千字以內的「千字文」，因為欲體貼資訊時代的閱讀耐性，欲予逐款年歲的人攏無壓力來看故事，親近媠閣趣味的臺語，嘛想講短文用來臺語自學、教學拄拄仔好。毋管你是讀文本抑是掃描QRcode 聽我的音檔，逐篇短短仔五分鐘內就完成。篇目多元閣獨立，想欲對佗一篇開始，看目錄在你選、在你揀，抑是隨緣掀開共點落攏是新奇，有無仝的趣味。欲聽、欲停攏在你。所以一寡較長、我不止仔佮意的新文章就無法度收入來遮。會當儉咧做另外的期待。
　　遮的文章，自2008年開始到2022，十二冬矣，有成「一粒紅紅飼甲大人」的國中生。敢是天意？註定欲陪𪜶111學年度上臺語課。不時有朋友共我講，我的文章用來準備臺語認證，提來教學補充，訓練寫作上蓋讚。有文學性閣趣味，用字簡單毋過藏足濟感情，看一篇無夠氣，會想欲閣看，毋過欲揣誠了工，閣驚落勾，拜託我緊出冊。多謝恁的支持佮意念，這馬真正出冊矣！咱做伙來愛臺語。這本冊佮《我咧唱歌》仝款，有字有音，有插圖有解說，毋過加三項寶貝，有圖典、素養互動提問佮克漏字，欲陪逐家自學佮教學。若是天意，嘛愛恁有佮意。
　　我驚收舊文章，對人客較失禮，毋過囥酒會芳呢！有人講毋管我寫家己抑是別人的故事，攏若像是逐家的故事，各種年歲攏看有。我佮意食一歲學一歲，十外冬定著濟少有成長，所以我共語詞、語法、語句修予閣較順，逐篇都si-á-geh 過。若有一半位仔用當初的時間、空間，是留欲見證寫作的彼段日子。若無細膩有一兩段仔佇《我咧唱歌》影過，彼就是我寫作的小宇宙！
　　有讀者誠幼路，發現我電子報的故事逐篇都有藏查某人的心聲，有時陣會看著少女的古錐，有時陣看著查某人的悲喜，有時陣中年簡單自然平常自在。真情真意的感情，沓沓仔講出來，看了得著安慰、較有勇氣行向未來。有影，當初佮邱文錫老師、陳憲國老師、藍春瑞主任做伙寫電子報，我是唯一的女性。而且我毋是寫小說，我是寫散文，我的故事佮我對臺語的感情仝款，攏是真的！我規頭殼較想嘛是臺語純文學，欲為臺語留音字，欲寫逐家看有的故事，予逐家輕輕鬆鬆來親近媠閣趣味的臺語文。予讀者一種邀請、接納、陪伴佮安心，看咧看咧就共臺語學起來！
　　欲按怎通自學、教學咧？綴音檔指字聽故事就好，莫去想艱難。看冊的時會當共較袂曉的字用鉛筆先框起來，到上尾篇就可能免框矣。嘛會當分段看抑是聽，停一下，想一下，自學查辭典，抑是用佇教學會當師生對話。逐篇有十个語詞註解，會當轉去文章揣寶、語詞延伸、綴咧造句，閣會當掠兩个、三个抑是五个詞來練認證的語句書寫，嘛會當查《教育部常用詞辭典》做語詞擴充。逐篇配合十二年國民教育素養教學，有攢幾條開放式、大人囡仔攏適合的問題，予親師生有對話，增加文章的理解佮批判思考生活議題。老師嘛會當走揣家己的記持，莫歹勢，換講家己的故事予學生聽，抑是予學生用臺語講類似的生活經驗佮想法。這本冊有一个特別的設計，雖然主編足驚散文集變做教科冊，毋過我感覺這是一種分享佮創意，閣較是為傳承臺語。請恁文章讀熟了後，一定愛練臺語漢字。我設計配合一學期20禮拜20篇，一學年40篇的克漏字填空的學習單，一篇100格以內，提供讀者綴冊的連結下載。你愛家己共印出來，配合文章的音檔，看家己的程度調整音速，抑是由老師控制當時欲暫停，當時欲閣開始，來熟手臺語漢字。加練幾張，保證免練甲煞，一寡會花去的字自然就學起來矣！閱讀佮練習若有夠，寫作就會變𠢕。你嘛會使照家己抑是學生的程度調整篇數，抑是仝款的篇目加練幾遍共練予熟。在你調整、在你決定。
　　感謝阮查某囝林芸瑄小姐，國立臺北藝術大學美術系畢業的青春藝術家幫我畫插圖。藝術性、藏佇圖裡的思考佮親切古錐的主圖攏是為著欲佮讀者較倚心。阮閣決定共逐篇主圖的邊仔，畫佮文章有相關的主題小圖典，通延伸學習佮增加師生對話，用簡單的線條佮圖形，予小小的圖有大大的妙用。臺語毋但媠閣趣味，阮想欲予臺語冊嘛有藝術感，閣有音、有字、有圖，攏總媠。
　　感謝文化部予我補助。足多謝何信翰教授等等的評審予我這个光榮，我才有出第二本冊為臺語拍拚的機會。感謝前衛出版社林文欽社長的支持、鄭清鴻主編的專業編輯，足濟文本、資料佮音檔連結幼路的工課，無主編袂使。伊專業的建議是我的大福氣。感謝我的寫作燈塔李勤岸教授做這本冊的顧問，予我閣較有信心，伊是我的恩師，一直關心我、指導我。感謝盧廣誠老師、陳憲國老師、鄭安住老師、林佳怡博士、甘佩玉小姐、蕭文如老師、鄭安秀老師，當初佇電子報予我的機會佮幫助。感謝守/ 酒臺語社的眾位老師佮沙龍晤的兄姊，這兩个倚心的讀冊會予我有寫作新文章的動力，嘛予我寶貴的建議。感謝顧怡君老師為我校稿，用全國賽閩南語字音字形金牌的實力予這本冊用字無重耽。感謝每一篇故事內底的親情五十、朋友、學生、厝邊隔壁，予我的文章足鬧熱。感謝我上親愛的阿母、伨我的兄姊、翁婿佮兩个貼心的寶貝查某囝，𪜶是我小宇宙的元神。佇我寫作的過程，天公的祝福佮上帝的恩典滿滿滿，我的性命攏是因為臺語，因為逐家，才會幸福閣美麗！

王秀容
2022.6.6 指南山城

家己講對你講

　　先來講冊名《咱來讀讀》，「咱」較親切，「來」是招你做伙，「讀讀」是用文白音的趣味講文章的來源佮期待。這本冊有我五冬56 篇教育部電子報「愈讀(tha̍k) 愈捌臺語( 閱讀越懂閩客語)」的專欄文章，有十二冬16篇全國語文競賽「閩南語朗讀(tho̍k)」的文章，閣有幾若篇我50 歲以後讀世間、看人生的短文。
　　毋管你幾歲，攏通輕鬆自在來讀這本冊。雖然文章有新有舊，毋過綴年歲我有成長，當初無夠幼路的想法佮語句攏閣共斟酌過，逐篇嘛共修予平均八百字長短，攏一千字以內的「千字文」，因為欲體貼資訊時代的閱讀耐性...

自序　家己講對你講

01　恩典　　　　　　　02　同窗
03　阿母逐日　　　　　04　阿媽種菜
05　阿公再見　　　　　06　關門開門
07　未食五日節粽　　　08　西瓜皮
09　學泅學飛　　　　　10　白賊話
11　談戀愛　　　　　　12　自由自在
13　原諒　　　　　　　14　四秀仔錢
15　新春快樂　　　　　16　行路
17　便所的味　　　　　18　做生日
19　賴你　　　　　　　20　舊衫
21　真珠奶茶　　　　　22　俗麭
23　思想家　　　　　　24　十冬
25　字紙　　　　　　　26　翕鏡
27　孤單快活　　　　　28　日誌
29　記持　　　　　　　30　十箍
31　期待　　　　　　　32　飯丸
33　食冰　　　　　　　34　做月內
35　四百萬用了　　　　36　米粉湯
37　衫仔弓　　　　　　38　高級屎礐仔
39　撓耳空　　　　　　40　正港的原住民
41　班長　　　　　　　42　便當
43　電話　　　　　　　44　民族救星
45　杯仔　　　　　　　46　喙瀾
47　家庭訪問　　　　　48　賣藥仔
49　咖啡　　　　　　　50　情人節
51　半老老　　　　　　52　寫日記
53　鉸指甲　　　　　　54　訂車票
55　下港人的特產　　　56　化妝品
57　氣象報導　　　　　58　講古講未來
59　山明水秀無憂愁　　60　烏石膽
61　阿義踅夜市　　　　62　空中小姐
63　玉蘭花　　　　　　64　日頭
65　搖囡仔歌　　　　　66　板橋查某純情曲
67　蕹菜　　　　　　　68　阿母的禮物
69　足𠢕毋通吼　　　　70　愛綴路的
71　蝴蝶公主　　　　　72　冊芳
73　看著幼囡仔　　　　74　一工趁一萬
75　我是高雄人　　　　76　比黃金較貴
77　啥物攏無做　　　　78　第一句話
79　哪會猶未睏　　　　80　咱來讀讀拚黃金

自序　家己講對你講

01　恩典　　　　　　　02　同窗
03　阿母逐日　　　　　04　阿媽種菜
05　阿公再見　　　　　06　關門開門
07　未食五日節粽　　　08　西瓜皮
09　學泅學飛　　　　　10　白賊話
11　談戀愛　　　　　　12　自由自在
13　原諒　　　　　　　14　四秀仔錢
15　新春快樂　　　　　16　行路
17　便所的味　　　　　18　做生日
19　賴你　　　　　　　20　舊衫
21　真珠奶茶　　　　　22　俗麭
23　思想家　　　　　　24　十冬
25　字紙　　　　　　　26　翕鏡
27　孤單快活　　　　　28　日誌
29　記持...