收藏
兩姊妹 Nn̄g tsí-muē
這聲伊無救矣，中風都第三擺去矣。連紲幾若暝，我攏uì彼間厝過（遐久仔咧歇熱），孜孜相彼扇迵光ê四角窗仔。連紲幾若暗，彼燈火我看都仝款，稀微稀微，勻勻仔著咧。假使伊人過身，我咧按算，彼鱟百冊暗tsiuh-tsiuh，面頂就有通看著蠟條ê光影；死體頭殼ê雙爿邊仔定著愛𫞼兩枝蠟條，這我知。伊遐久仔常在共我講：「這世人，我賰無幾日矣。」我攏叫是伊凊彩講--ê。到今才知影，遮話攏是講正經--ê。
逐暗相彼扇窗仔，我攏會家己細細聲仔喃彼字：麻痺。這个字我串聽都袂慣勢，就親像游居列（Iû-ku-lia̍t）ê幾何學彼字‘gnomon’（曲尺形），猶閣有《教義問答》彼字‘simony’（買賣聖職罪）。毋過現此時，這字敢若是佗一項妖邪罪惡ê名號。我聽著心會驚，又閣數想欲倚近一步，看伊按怎來取人ê性命。
我lueh樓跤食暗彼陣，卡妥（Khah-thò）伯仔坐佇烘爐台邊咧食薰。阿妗𣁳燕麥糜欲予我，這陣卡妥伯仔開喙，敢若是踅轉去伊進前ê話頭：
「無咧，我共看，伊無的確是按呢……總是，伊有啥物所在龜怪龜怪……看著誠蹊蹺。我講我ê想法，恁聽看覓……」
卡妥伯仔又閣薰吹那噗，腹肚內穩當咧鋪排家己ê想法。這箍老番顛，看著就齪！阮初初佮伊熟似彼陣，伊定咧講薄酒佮激酒咧用ê蛇形管，聽著猶心適心適。毋過，講無兩三輾半我就𤺪矣，激酒ê代誌講甲毋知通煞。
「這層代誌，我家己有見解。」伊講，「在我所看，這層是……誠怪奇ê例……。毋過又閣誠僫講……。」
伊又閣去噗薰吹，高見也無講予阮聽。阿舅看我戇神戇神，就共我講：
「今，你彼个老朋友人無去矣，你聽著穩當會艱苦。」
「是siáng啊？」我共問。
「夫麟（Hu-lîn）神父啊。」
「伊過身矣--sioh？」
「卡妥先生今仔講--ê，伊拄才uì彼間厝過。」
我知影𪜶逐家都相uì我遮來，就做我食我ê，袂輸這个
消息佮我無底代。阿舅共卡妥伯仔解說講：
「這个囡仔佮伊是偌好ê朋友呢。無講你毋知，老歲仔捌教伊偌濟代誌呢。人𪜶咧講，老歲仔對伊是寄望偌大咧。」
「向望天主饒赦伊ê靈魂。」阿妗虔心虔意。
卡妥伯仔共我相有一時仔。我有一个感覺，伊彼對烏目仁細細粒仔，圓圓金金，掠我直直繩8。毋過我干焦顧食家己彼盤，才無愛攑頭佮伊衝著面。伊閣轉去噗薰吹，落尾誠粗魯，一喙痰瀾雄雄呸去烘爐裡。
「我家己ê囡仔，」伊講，「無愛予伊參彼款人行傷倚。」
「卡妥先生，這是按怎講咧？」阿妗共問。
「我這意思就是，」卡妥伯仔應講，「囡仔會夆汰歹去。若我ê想法是，囡仔人就予𪜶佮仝沿--ê去走跳𨑨迌，毋是佮……捷邱（Tsia̍t-khu），我按呢講著無？」
「我正正嘛是按呢想，」阿舅嘛講，「予伊學會曉家己徛起。彼爿咱這箍薔薇十字會ê大德，我嘛一直按呢共講：較捷運動咧。為怎樣講咧？我做囡仔ê時陣，寒天熱人不管，逐工早起時仔我都洗冷水，到將時嘛一直堅持。教育是自細項影響甲大項呢……」伊越頭共阿妗補一句，「咱羊腿肉毋著切一塊來請卡妥先生。」
「毋免毋免，毋通費氣。」卡妥伯仔共應一句。
阿妗共菜櫥仔彼盤羊腿肉捀出來，囥佇桌頂。
「卡妥先生，啊你是按怎講按呢會汰歹囡仔？」阿妗咧共問。
「這對囡仔人毋是好代，」卡妥伯仔應講，「都𪜶這心性一下就去予𪐞著。囡仔人若看著彼款代誌，煞毋知影會有敗害……。」
我燕麥窒甲規喙空，若無恐驚會氣一下出歹喙。這箍紅鼻頭老侗戇，誠㤉潲咧！
時到深更，我才睏去。去予卡妥伯仔共我當做囡仔人，我足刺鑿。猶毋過頭殼內猶咧攪絞，伊一寡話無講予明，我欲共想予透機。房間內暗趖趖，我又閣去想著彼个麻痺ê人，看著伊面色漚殕。我毯仔搝起來掩頭崁面，孜孜想uì救主誕ê情景，毋過，彼个漚色ê面容猶咧膏膏纏。伊佇遐咧細聲仔唸，這我理解，伊有代誌欲來告解。我這心魂敢若勼佇邊仔，滋微滋微閣無好意。是講來甲遮，又閣看伊猶原咧張等。伊tshi̍h-tshi̍h-tshū-tshū開始共我告解，啊我煞想無，是按怎伊一直笑面笑面，是按怎伊喙脣溼溼閣略仔帶泡（pho）。毋過尾仔才想著，伊是中風麻痺才去予曲去。我有智覺，我家己嘛是淡薄仔笑面，若像欲去開赦伊買賣聖職ê罪行。
隔轉工早頓食飽，我去大不列顛（Tuā-put-lia̍t-tian）街欲看彼間小樓仔厝。這間店仔無蓋影目，馬馬虎虎共號做「布店」。布店主要是咧賣囡仔人咧穿ê膨紗鞋仔襪仔彼類，閣有雨傘。普通時仔，窗仔口定定吊一塊牌仔，頂面寫：「修理雨傘」。這馬鱟百冊挩（thuah）落來，彼塊牌仔就無看著。
門圈遐提紗仔帶結一束烏紗仔花，有兩个散赤婦人人佮一个送電報ê查埔囡仔，咧看烏紗仔花頂面鉼（pín）--ê彼張卡片。我嘛倚去共看：
1895年7月初1
詹斯．夫麟（Tsiam-su Hu-lîn）神父
（在生佇彌斯（Mí-su）街ê聖凱瑟蓮（Khái-sik-liân）教堂服務）
享壽六十五歲
望伊安息！
看著卡片，我才欲相信伊人無去矣。看家己煞規个人愣去無反應，我心頭就袂定著。伊若是猶佇咧，我會去布店後尾ê暗間仔，看伊人佇烘爐邊彼條靠手膨椅咧坐，一領裘仔大大領包甲絚（ân）擋擋。阿妗凡勢會愛我共紮一包「敬祝」牌ê鼻薰，這項禮物來到地，伊精神就隨來，袂閣再頭昏腦鈍。較早，攏是我共規包鼻薰入lueh彼枝烏色ê鼻薰矸仔，若無，伊手掣甲傷食力，鼻薰見擺就掖lueh塗跤欲甲半包。甚至，伊一肢大手顫咧顫咧徙來甲鼻仔遮，鼻薰屑仔嘛是若烏煙按呢，對指頭縫洩洩lueh裘仔ê前襟。伊彼領久年ê教士長袍，無定著就是常在去坱著鼻薰，彼號青綠色緻才會看著烏漚烏漚。伊彼條紅手巾仔，規禮拜予薰沙仔滒（kō）甲一跡一跡反烏去；提彼條巾仔欲筅（tshíng）掖落ê薰沙，較筅都無效。
我想欲入去共看覓咧，煞無膽來敲（khà）門。我按街仔路有日頭ê這爿，慢慢仔行uì別位去。沿路行，店面見本櫥ê戲院海報，逐張我攏共讀讀咧。不管是我家己抑是這工ê天氣，敢若攏無悲傷ê氣氛，我感覺誠蹊蹺。我甚至咧起懊惱，看家己遮爾自由自在，袂輸伊人過身煞予我去得著解脫。欲哪會按呢，我想攏無；親像昨暗阿舅咧講--ê，人伊捌教我足濟代誌呢。伊捌去讀羅馬ê愛呂蘭神學院，才有通教我正範ê拉丁語發音。伊捌共我講地下墓壙ê故事，閣有拿破崙．旁拿巴（Ná-phò-lûn Pông-ná-pa）ê事跡。各種彌撒（mî-sat）儀式，猶閣有各種祭典穿插ê意義，嘛解說予我知。有時仔伊會家己做議量，刁工提一寡困難ê問題來考問我。伊會問講，搪著某一款情境，咱人該當按怎？或者是，某乜款ê罪行是滔天重罪，抑是可饒赦ê小罪，抑是講只是人性無完滿爾爾？伊按呢來考問，我才了解，一寡教會制度我一直掠準上蓋簡單，當時仔是千枝萬葉又閣微渺神祕。神父也著愛主持聖餐儀式，也著愛保守人告解ê祕密，這寡責任我看著是有夠重大；按呢我就想無，是按怎有人有彼號勇氣來承擔。甲按呢，伊閣捌講過一項，我就較無遐意外：教父寫ê冊逐本都厚tut-tut，敢若《郵遞名錄》，彼字是印甲密喌喌，袂輸報紙頂面ê法院公告，欲來詳細開破所有複雜ê問題。便若搪著伊這款問題，我定定無才調共應，無就是黐黐突突（ti-ti-tu̍t-tu̍t）講一寡悾仔話。伊常在就那聽那笑，頭頕兩三下仔。有時陣，伊會考一寡伊教我暗唸ê彌撒對答。我若唸了會紲拍，伊嘛是頭頕頕、人笑笑，那咧想啥，三不五時，鼻薰規大撮輪流㧣入去兩个鼻空。伊若笑，規大排走色ê喙齒常在現現出來，喙舌閣搭佇下脣。阮頭起先熟似彼陣，對伊猶無啥了解，伊這號癖性，我看著會礙虐袂自在。
行來到日頭跤，我想著卡妥伯仔ê話，頭殼就一直咧想昨暗ê眠夢紲lueh是又閣按怎。我會記得，有看著絲絨ê長布簾仔，佮一葩古早式ê吊燈。我敢若人是佇咧遙遠ê他鄉外地，奇風異俗—共想是波斯ê款……。毋過，袂記得這場眠夢是按怎來煞尾。
暗晡時，阿妗𤆬我去共喪家致意。彼陣日頭落山矣，毋過一寡厝向西ê玻璃窗仔，有炤（tshiō）著大鉼（phiánn）雲尪帶塗黃色ê金光。藍妮（Nâ-nî）招待阮入去客廳。當伊ê面大聲相借問，會失人ê禮，阿妗就共藍妮雙手捏咧，表示心意。老oo-bá-sáng出手對樓頂小比一下，欲探看阮ê意思。看阿妗頕頭，伊就𤆬頭代先一步，瞪力uì彼支狹櫼櫼ê樓梯共𬦰起去。伊向甲誠低，頭強欲佮樓梯ê手扞平懸。到甲頭一个樓梯臺仔，伊停跤擛手，招阮來去徛靈ê彼間房，遐門開開。阿妗入去矣，oo-bá-sáng看我猶咧躊躇，就又閣一直擛手來招。
2024專利防護中