收藏
二手徵求有驚喜
§活甲真有尊嚴
我一直無閣收著阿兄的批，讀怹遊行的報導，有看著一小段：
「遊行中，有一个精神失常的少年人，踮總統府的頭前自焚身亡，經查證，少年人名做林信理。」
我搦(lat)絯報紙，目睭即時烏暗去，若雨水的目屎直直流，親像摔落去萬丈深坑，大聲叫喝，信理！信理！
聽無伊親切的男高音，攏是我心內，陳袂煞，怨傷的脆(tshè)雷，
我閣大聲喊喝，報導的記者，恁的良心佇佗位？恁的良心揹踮跤脊骿？
隔工，我去共于主任請三工假，講我厝裡臨時有代誌愛趕轉去台南，于主任親像知影我的心事。
「玉真！妳若欲停較久，事後補假道好。」
到厝，章伯仔章姆仔做伙徛踮門口，我攬絯章姆仔，大聲哮，章姆仔細細聲仔：
「阿真，哮予夠喟，共妳悲慘的身世哮哮予出來。」
過有一時仔，章姆仔牽我入去厝內。
「恁章伯仔有倩人運信理的遺體轉去泰源。」
我攑頭，細聲共章姆仔章伯仔說謝。
「阿真！」章伯仔踏倚我的身邊，親像我細漢時接接聽著，伊親密的叫聲。
「信理真勇敢，恁有勇敢的爸母。」
我靠倚章伯的肩胛頭，閣大聲哮。
等我哮有一時仔，章姆仔閣細聲：
「有一个信理的朋友來揣阮，講信理有留一張批，交代伊親身交予妳。」
「信理的朋友叫做啥物名？」
「王輝民。」
「章姆仔，妳緊聯絡伊來台南。」
章姆仔限時專送予王輝民，隔工過晡仔，王輝民道到位，阮請伊入來坐，伊隨撏(jîm)信理的批㧣予我。
阿真：
鄭烈士偉大的精神喝醒我的良知，我無閣躊(tiû)
躇(tû)，決定追隨伊的跤跡，延續伊勇敢犧牲生命的精神。
阿俊神父有共我講過怹愛蚵蓮人的革命歷史，
1916年復活節的起義，康努利，五个起義領袖之一，
嘛是工會的領導者，佇起義的爭鬥中，伊受重傷，
英帝國殖民政府判伊死刑，伊徛袂起來，英軍硬共伊縛踮椅仔頂銃決。
這个殘忍事實流轉出來，愛蚵蓮人著驚，憤慨，痛罵殖民政府的惡毒，經過三冬，三冬！
1919年，天主教徒的愛蚵蓮人聯合基督教徒的愛蚵蓮人，發起愛蚵蓮人的獨立建國戰爭，
1922年，英軍撤退，愛蚵蓮人建立怹的自由政府。
妳知影，咱爸也泰源起義予殖民政府判死刑銃決，
七銃加一刀，七粒銃籽孔閣加一刀切斷血脈，已經經過較加二十冬啦，較加二十冬！
台灣人猶是親像七月半鴨仔佇聽陳雷！
阿真！我向望我的怒火會有較濟人看著，我的信心無動搖，
我拜託好友王輝民，等遊行煞才共批交予妳。
我那讀目屎那滴落批紙，讀煞共予目屎滴甲澹澹的批紙㧣予章伯仔，伊佮章姆仔做伙看，章伯仔讀煞，大叫一聲：
「英勇的信理！」
章姆仔共批交予王輝民，伊讀煞共批交還我，感動人的低音，叫聲：
「信理你活甲真有尊嚴！」
阮無閣交談，恬恬追念信理，向望傳承伊的奉献。
過有一時仔，王輝民徛起來佮阮相辭，講伊盈暗有代誌愛趕轉去嘉義，
我送到門口，伊斡頭，低音，希望咱會閣見面。
我傂落去膨椅，睏神綴踮連日的哀哭，連日的心悶，連日的操勞的後壁，
假若狗蟻仔咧趖趖規身軀，閣趖趖入去頭殼內，
我手猶提牢信理的批紙，嘛趖爬甲規張批紙，目睭酸澀(siap)，隨瞌去。
我家己閣去爸也的墓地母也的新墓排踮身邊林投發甲掩掩掩堀仔底猶是規堀仔蛇四界趖彼尾蛇頭勼甲若湯匙的飯匙銃蛇殼褪較加半身嘛閣新生出來閃熾的新殼我斡一下頭湯匙仔蛇頭煞化無去換做爸也的頭殼我大聲叫爸也煞閣生出來信理的頭殼我著驚大聲叫爸也閣叫信理大聲大聲叫大大聲
「阿真！」章姆仔出力搖我的肩胛頭。「妳做啥物歹夢？」
「毋知是啥物，」我細聲應，心肝頭猶碰碰趒，無講我做的怪夢。
「眠床較好睏。」章姆仔牽我入去房間，共電火轉花。
隔日睏醒，頭一項代誌，我寫批予王輝民，講我足想欲聽伊講信理的故事，時間若會拄好，才拜託伊來台中見面。
過晝仔，我佮章伯仔章姆仔相辭，講我干單請三工假，怹送我到門口，我請怹莫閣送，章伯仔牽絯我的手。
「阿真！我有佇讀妳寫的報導。」
我歡喜的心肝頭雀雀趒，接接共伊抌頭。
「阿真！」章姆仔甜蜜的幼聲。「今偆妳家己爾爾，妳道愛較細二咧！」
我的目屎擠出來目尾，講我踮巷仔口閘計程仔去火車頭，目屎那流那拽手，一伐仔一伐，行去巷仔口。
2024專利防護中