挩窗去弄險：大士爺厚火氣

第九集
紅線（Âng-suànn）

看大道公無閒甲，挩窗和哈囉感覺真歹勢，毋敢攪吵，佇廟角那啉青草茶那參詳：「敢講咱落空逝，大道公叫袂行啦。」挩窗真煩惱。
「大道公做代誌綿死綿爛，無到十全袂煞。伊的俗名號做吳本，為著欲救濟病、老、幼、弱，四界去揣草藥仔，無張持跋落山崁死去。上天帶念伊的德行，助伊得道升天，來做醫藥之神。」哈囉講。
規个保生大帝廟空lo-lo、恬tsih-tsih，干焦聽著挩窗共茶吞落嚨喉空的聲，廟暗眠摸的內底點一葩火，傳來大道公攑筆寫病歷的窸窸窣窣。
「大道公毋但是醫藥之神，嘛是阮虎仔兄弟的恩情人，」哈囉𤆬挩窗來到壁堵的石雕頭前，那欣賞那開破：「彼時，大道公為著採藥，行入去內山斗底，暴憑一隻虎傱出來，生做白額金睛，面橫霸霸。原來，彼隻為非糝做的食人虎踢著鐵枋，嚨喉空去予人的骨頭哽著，艱苦甲！大道公就佮虎品予好，以後袂當閣食人，食人虎頕頭允伊，大道公才燒符仔水灌入喉，骨頭化去，阮彼个虎仔兄弟才共命救轉來。自彼工開始，升做大道公的坐騎，烏虎將軍就是按呢來的。」
「啊！這我知！阮阿無庄的鐵牛伯仔有講過，這叫做『醫虎喉』，敢若閣有龍的款呢⋯⋯」挩窗煞想袂起來。
「點龍眼啦！」哈囉𤆬挩窗行到龍爿，仝款有一塊石雕：「彼時有某乜人來揣大道公看病，講目睭無蓋爽快，大道公隨共拆破，講你毋是人啦，神龍隨現出原形！大道公就攑毛筆共點目睭，神龍的病就好矣，真正是看會清、看會明。」
「喔，鐵牛伯仔講伊目睭濛霧，會澀會驚光，醫生講伊白內障。仝款的症頭，像龍彼種神獸，活千千萬萬年，規工佇天頂飛，日頭赤焱焱目睭仁熟去，嘛著白內障矣。」挩窗按呢想。
「你閣真𠢕講咧，去做醫生好矣啦！」哈囉共挩窗刮。
「鐵牛伯仔常在講，莫佇關公面頭前弄大刀，我才毋敢佇大道公面頭前講醫術咧。遮的故事攏真好聽，敢閣有別个？」挩窗無愛聽教示，較興故事。
「有囉！有囉！」哈囉看挩窗遐興，精神就來矣：「你敢知大道公的醫術有偌𠢕？名聲是透京城！早當時，宋仁宗的太后，就是皇帝的老母破病，御醫治袂好，就共全天下有才調的大夫叫來，仝款束手無策。終其尾，由咱大道公來解破，敆藥仔寬寬仔來調養，太后的病就好矣！」
「莫怪會來做神明，正正是神之雙手！」挩窗真佩服大道公。
「上精彩的我猶未講啦，漢醫的手路是望、聞、問、切，愛節脈來看病。毋過，彼時男女嚴防、授受不親，太后閣是奶仔生歹物，袂當入去繡房，你敢知大道公是按怎看病的？」哈囉問。
「蓋成老師咧考試，這條題目我臆無啦！」挩窗應。
「你講偌厲害就有偌厲害，大道公撏一條紅線出來，請宮女牽入去房間內，佇太后的手節拍結，繃予直，就按呢來節脈，會當講有偌厲害就有偌厲害啦！」哈囉講。
「著啊，我想著矣！」挩窗雄雄想著。
「啥物著矣啦？」哈囉問。
「著矣！著矣！這就是答案矣啦！」挩窗緊捷快來到兩支白柱仔頭前，頭圇入去中央的空縫，共大道公拜託：「真人，歹勢，借問一下，敢閣有紅線？」
來講民雄的保生大帝廟，佇椅仔歇喘的寶釵媽，腰袂疼矣，人煞盹瞌，頭頕咧頕咧……
現此時七月二三、下街上尾一工的黃昏，君臨天下的燦爛太陽就欲沉落海。日頭光愈來愈斜，斜到一个角度，袂輸空來接榫，日頭光共風窗穿過，踮壁堵面割四塊金葉仔出來，金燦燦、媠嬰嬰，寶釵媽去予驚起來：「夭壽喔！是發生啥代誌？唉！我的糖霜丸仔到底佇佗位啊？」
阿媽的寶貝孫挩窗，就徛佇頭拄仔害伊跋倒的戶橂頂頭。
共虎爿雲抨起去，敢若沖天炮，隨拚去鬼王的頭殼頂頭。
鬼王浮佇咧半空中，無振動。
進前鬼王去逐龍爿雲，雲愈飛愈細塊，水氣沓沓仔蝕去。尾手仔，鬼王火都猶未噴，雲就消失去。
去予騙過一改矣，鬼王無遐戇，佇原底的所在，等待。
看鬼王無動靜，虎爿雲嘛停落來。
鬼王的獠牙攕出來，奸笑，雙手插踮胸坎，看雲欲變啥蠓。
雲就共尾溜捽出來，扭咧扭咧，共伊恥笑。
鬼王喙拍開，假影欲噴火，雲緊來閃。
無啦！滾耍笑爾爾！鬼王喙舌吐吐，隨收倒轉來。看著雲去予騙去，暢甲笑出來，彼个「吱吱吱」的笑聲，袂輸夜市仔賣的、捲做一丸、用喙歕就伸長長的觱仔。
雲去予使弄，氣甲慄慄掣，若親像𢯾貼（moo51 ta11 ／モーター／motor）紡緊，色水按白、轉殕、變烏金。
鬼王共旗仔夯起來，假影欲摃，伶俐的雲隨閃去邊仔，毋過，啥物攏無發生。
雲確實是受氣矣！就共尾溜拍結，形若毛筆的頭，墨膏搵予飽，共天頂當做紙，落第一撇。
鬼王雙手展開，意思是：「這有啥？」
雲閣寫三撇，成做一个漢字：「火」。
鬼王頕頭，意思是：「這字簡單，我知影。」
紲來是一橫、兩撇，「大」這个字就寫好矣。
鬼王比大頭母指家己，意思是：無毋著，我是一切火燄的老大。
雲的尾溜閣拍一个結，佇「大」頂頭崁一个「口」，落尾閣寫一徛。
有黃錦錦的天頂拍底，「火呆」兩字去予看現現，覕踮打貓街仔的神鬼妖怪全笑出來。
鬼王面底皮盡掃落地，氣甲牙齴齴，心狂火著的伊，按喙口吐一條長長的三昧火舌出來，這改旗仔是夯真的，雙跤一躘，靴仔出火金星，催盡磅去逐。
虎爿雲知影會無命，早就旋去矣。
塗跤面的打貓街仔，換挩窗𤆬頭，哈囉的尾溜，結一條長長長的紅線。

第十三集
批信（Phue-sìn）

服務台連紲放送三、四擺，寶釵阿媽等規晡，等甲晡攏軟去矣，猶原無挩窗的消息。
電風寬寬仔踅頭，向坐佇咧藤椅的阿媽，共日誌紙的角吹起來。好心的服務人員毋但奉茶，閣共阿媽掠龍予伊較輕鬆咧，問講：「若無，咱來報警察？」
寶釵阿媽隨徛起來，應講：「這个猴死囡仔佇田庄定定旋出去，褪赤跤一八溜溜去，欲倚暗才轉來！小等一下乎，我閣來揣看覓，就毋信揣無啦！」
袂輸鵝母行路，阿媽的尻川斗重橫橫，跤步徙一下徙一下，軁過廟門，來到簾簷跤。暗頭仔的民雄，夕陽袂輸去予抐甲散糊糊的鵝卵仁，紅霞滿天。
阿媽和挩窗看著的，是仝一片天，鬼王傷囂俳，規个打貓的天頂去予燒甲紅絳絳。挩窗越頭，看著開漳聖王插胳，開台尊王攬胸，哈囉䖙踮塗跤，用後跤爪共虎毛捋捋咧，無攬無拈。
「後一關，咱就愛去問大眾爺。仝款有鬼王佇咧釘，調虎離山的計智袂當閣用矣，若放送驚會漏洩天機，閣有啥物法度啊？」挩窗真無奈。
「你是勇敢掛智慧的挩窗小英雄，怎會變無步！」哈囉共刮。
「我想著阿媽。」
「乎！你會驚矣乎！想欲旋無想欲破關是無？」
「無啦！我閣想著阿媽講過的話，伊講：『跤手毋免濟，合用才是款。』這馬，咱該來揣家私。」
就佇這个時陣，一條清涼的風颺過，彼是拄才仔觀音現身的時陣偷走出來的，號做：「摸飛一條風」。關佇普陀巖內底傷無聊，摸飛一條風走出來踅踅咧，踅過服務台，共日誌的紙角仔掀起來，挩窗眼著白白無印字的後壁面。
「著啦，咱來寫批，」挩窗隨講隨裂一張日誌紙落來，講：「七月二三就欲過矣，強欲無時間矣。來，咱寫批來問大眾爺，佇遮借問……借問諸神尊有siáng 會曉寫字的？」挩窗問。
「予我來！」開漳聖王陳元光共手䘼撆起來，講：「是我將漢字傳至漳地，完成此歷史任務⋯⋯來！案几搬來，硯台磨墨，紙鋪予平！」
接著命令，輔信、輔義將軍跤手猛掠，隨共聖王的冊桌仔拎過來。
書僮手扲墨條，斟寡水踮墨盤，勻勻仔磨，磨甲墨膏烏㽎㽎。
聖王坐正正，手攑毛筆去搵墨，紙舒予平，勻勻仔寫批：「大眾爺台鑒……」聖王的漢文寫甲有條有段，字骨四正，共代誌頭尾講予透流，終其尾徛名：「聖王敬啟」。印仔頓好勢，交予挩窗。
「幼路閣厚工，感心啦！」挩窗講。
「毋是寫字爾爾，愛寄到位啦！」哈囉共黜臭。
「我早就想好矣，免煩惱，」挩窗老神在在，對開台尊王鄭成功講：「尊王，勞煩共彼粒挽落來。」
「是佗一粒？」鄭成功問。
「就是吊佇樑仔角，雕甲若花籃彼粒啊！」挩窗講。
「喔，你是講花籃啊！我來！」鄭成功行來花籃下跤，捘電火珠仔彼款勢共捘落來。挩窗共批紙拗做細細仔一角，橐入去花籃內底，講：「有請尊王開球！」
「哈！哈！我知影你的意思矣！這是限時批，予我來寄去大眾爺遐，請共門拍開！」鄭成功真將才，手夯懸懸身軀徛坦直，共花籃夯懸懸，學野球的投球屈勢，一个頓蹬，倒跤伐大步，坦敧身，腰的中箍扭落去，用規个金身的力頭共花籃這粒球掔出去，廟門隨拍開，向服侍大眾爺的福安祠遐射去。
「直球！這是上靈聖的快速球！」挩窗拳頭母捏咧，用欽佩的雙眼去看鄭成功，鄭成功嘛真滿意，搝一个弓箭大聲喝：「媠啦！」
花籃「siû」一下就到福安祠廟口，不妙！鬼王眼著，連鞭夯旗仔摃落去，「phóng」一聲，兇光正正著花籃，隨來爆炸。
「啊，落氣啦，去予摃安打！」哈囉吊白目。
鄭成功人真硬氣，毋甘願，請陳元光再寫一張批，橐入去花籃，喙齒根咬落去：「這改力頭會閣較飽，定著會拍破神明界的球速紀錄！」
第二球，鄭成功按石攄頭前開始衝，衝甲廟門欲到戶橂彼搭，掔手榴彈彼款，花籃搩出去，鑽過神明界的空間，後尾出火金星，一聲就到福安祠廟埕，phóng！這改鬼王阿焦哩（當たり），花籃去予摃一下碎鹽鹽。
「哇，𢼌假的，去予摃Hông-put-láng（homerun）矣！」講著挔柴添火著，哈囉第一名。
鄭成功愣去，氣甲慄慄掣。
「直球去予料準準，催球速無效，尊王，咱愛改變球路。」挩窗建議。
「你是咧講，改換變化球？」鄭成功應。
「直弄送袂通，就愛來轉彎踅角，無，偉大的投手是按怎來的？」
挩窗來鼓舞鄭成功。
「好，咱著換手路，是欲改變搦球的鋩角？或者是掔球的屈勢？」鄭成功問。
「攏毋免，咱來跋桮就好，桮是月眉形的，會轉彎踅角。」挩窗就去捎祭桌頂頭的桮，共批縛佇頂頭，略略仔抨出去，鄭成功承起來，輕可啊輕可，指頭仔擉出去，桮就飛出去矣。
鬼王看一个影，想都無想就用旗仔摃，無桮。兇光真兇狂，目標無揣著煞來滅去，一好球。鬼王旗仔閣摃，桮分做兩爿趖去福安祠內底，無摃著，兩好球。
入廟的桮隨去予抨出來，兩塊桮敆做一个太極，一笑一覆、半烏半白，袂輸干樂拍箍仔，踮打貓的街仔路踅咧踅咧踅轉去大士爺廟，鬼王看甲目睭花，旗仔烏白摃，兇光亂射，「phóng」一聲，閣滅去矣。
「哈！哈！鬼王三振出局！」挩窗歡喜甲跳起來。

第九集
紅線（Âng-suànn）

看大道公無閒甲，挩窗和哈囉感覺真歹勢，毋敢攪吵，佇廟角那啉青草茶那參詳：「敢講咱落空逝，大道公叫袂行啦。」挩窗真煩惱。
「大道公做代誌綿死綿爛，無到十全袂煞。伊的俗名號做吳本，為著欲救濟病、老、幼、弱，四界去揣草藥仔，無張持跋落山崁死去。上天帶念伊的德行，助伊得道升天，來做醫藥之神。」哈囉講。
規个保生大帝廟空lo-lo、恬tsih-tsih，干焦聽著挩窗共茶吞落嚨喉空的聲，廟暗眠摸的內底點一葩火，傳來大道公攑筆寫病歷的窸窸窣窣。
「大道公毋但是醫藥之神，嘛是阮虎仔兄弟的恩情人，」哈...

踏話頭　挩窗去弄險
　　
2012年的熱天，彼時阮查某囝猶細漢，暗時電火關起來欲睏進前，若無講故事予過癮，是絕對袂放我煞的。

按呢逐工講逐工講，我烏白編亂亂說強欲無膏矣，囡仔硬愛我講落去，而且閣出難題：阮欲聽獅仔的故事啦！
嘛毋知欲講啥，我就講有一隻獅仔，廟門祀的彼款石獅仔，伊尻川癢，癢幾若十冬矣。
話頭遮爾仔趣味，查某囝精神就來矣，要求我共故事講透流。進前全無本，時到時擔當，紲落來我就講這隻石獅仔迒過神人的隔界，趁廟口無人，央一个囝仔兄來共爬癢，解決伊的舊症頭。（註1）

囡仔兄就是這本冊的主角：挩窗（Thuah-thang），佇彼个暗暝顯聖，行來我佮查某囝的地頭。毋管是食飯、睏進前、或者坐車無聊時，見若有要求，我就來講古，講挩窗佇人世和神明界飛天鑽地，走跳台灣南北二路，行踏世界各國，這个囡仔兄𤆬領阮規家伙仔挵入去奇幻的宇宙，可比拍電動解破一關閣一關，精彩刺激，鬧熱趣味。故事有長有短，有零星有規部的，抾拾整理好勢，用台文落筆，這就是「挩窗去弄險」系列。

Thuah-thang，四常的意思是人目睭仁對袂正，雞仔目，袂輸共人譬相；佇我的故事內底，「挩窗--ê」是一个勇敢掛智慧的小英雄；毋閣，若按日常的口語寫做台文，踮文學藝術的境界，「挩窗」的意義是：共心肝頭的窗仔門挩開，來去看這个美麗新世界。

2014年11月初，毋知是啥因端，雄雄想欲去騎虎王爺遐拜拜。踏踮廟埕，囡仔時來這搭圍仔補作文、食筒仔米糕的記持就瀳倚來矣。1984年騎虎王爺廟過翻起新廟，舊料保存落來，有影頂真，上寶貴的是柴雕的鰲魚，幼路閣活氣。較拍損的是，檢采為著保護驚去傷著，煞關佇咧鐵窗仔內。
我隨咒誓，定著來寫故事，共鰲魚救出來。（註2）

按怎救呢？自細漢蹛民雄街仔附近，規年迵天上重要的鬧熱，就是下街（Ē-ke）。彼是民雄囡仔最大的向望，我就共踅下街鬥鬧熱的歡喜和在地的歷史敆做伙，連紲三工佇飯桌仔全台語講古予查某囝聽，紲來用華語拍粗稿，先囥咧。

等我台文寫甲較扭掠矣，網路的發表平台嘛有新進展，就主動共SOS reader 提案，感謝團隊的牽成，2016年12月起鼓網路連載，一禮拜刊一集，攏總三十集，有台語文、相片影片、超連結解說佮錄音唸讀，這就是網路版的《大士爺厚火氣》。
這馬，交踮你手頭的，是紙印的《大士爺厚火氣》，多謝前衛出版社和主編鄭清鴻綿爛編輯，國藝會和火金姑台語文學基金補助，洪福田的版畫藝術，排版束結，朗讀錄音紲拍好聽，予這部出版計畫毋但完成，閣予台文冊一坎起去，實在是豐沛、媠氣、奅啦！

順聰我骨力拍拚創作《大士爺厚火氣》，是欲來建立「現代台文」敘述SOP，予台語飽滇的力頭盡展；而且用輕鬆活跳的小說，𤆬讀者來認捌台灣的神明鬼怪、歷史地理、傳說故事；上要緊的是，思考現代文明的困境佮未來。

故事全我編的，純屬虛構，若有雷同，彼攏是䢢拄䢢。內容對神明不敬的所在，請多多包涵，順聰我做的一切，攏是為著推捒台語，共咱的文化底蒂和宗教精神發揚光大。

當咧寫故事之時，九十幾歲的阿媽忽然間倒勼，轉去做一个囡仔，講話離離落落，頭殼沓沓仔失去……我看著真毋甘，就去握伊的手……經歷人生滄桑坎坷，阿媽的手面親像囡仔遐爾仔金滑幼秀……講著下街，阿媽煞記甲真清楚，講往過𤆬我去看大士爺伯化火的記持，宛然拄去過彼款……。

細漢時上愛轉去阿媽的田庄遐耍，佇古厝的眠床頂，聽阿媽講ももたろうさん（桃太郎）物語，我講古的才調是伊傳予我的。阿媽的台語講甲遐爾仔老（láu），我是一个冊讀甲真懸的智識分子，閣是攑筆的作家，怎會當輸予共我惜命命的阿媽呢！

「挩窗去弄險」系列故事，毋但講予我的查某囝聽，是欲予全台灣的囡仔聽，千千萬萬的囡仔聽，大人嘛愛斟酌聽─恁會當佇故事內底使囡仔性，佮「挩窗」仝款，四界行踏，認捌這个心適到有賰的美麗世界，啥物攏毋驚。
準備好矣未？和我同齊大聲喝出來：

我是勇敢掛智慧的小英雄，這場人生的大弄險，來起行！

註1：完整故事刊印佇《牧笛獎精品童話11：蒼蠅螞蟻讀心術》，鄭順聰〈屁股癢的石獅子〉彼篇，國語日報出版。
註2：我寫的是彼時的情形。後來，廟方共鐵窗仔換做新櫥仔，做甲真好勢，鰲魚這馬蹛佇咧真四序的所在呢。

踏話頭　挩窗去弄險
　　
2012年的熱天，彼時阮查某囝猶細漢，暗時電火關起來欲睏進前，若無講故事予過癮，是絕對袂放我煞的。

按呢逐工講逐工講，我烏白編亂亂說強欲無膏矣，囡仔硬愛我講落去，而且閣出難題：阮欲聽獅仔的故事啦！
嘛毋知欲講啥，我就講有一隻獅仔，廟門祀的彼款石獅仔，伊尻川癢，癢幾若十冬矣。
話頭遮爾仔趣味，查某囝精神就來矣，要求我共故事講透流。進前全無本，時到時擔當，紲落來我就講這隻石獅仔迒過神人的隔界，趁廟口無人，央一个囝仔兄來共爬癢，解決伊的舊症頭。（註1）

囡仔兄就是這本冊的主角：...

踏話頭　挩窗去弄險
序　　開窗冒險去

第一集　　　蠟條
第二集　　　加薦
第三集　　　尾溜
第四集　　　打貓
第五集　　　茶鈷
第六集　　　珍珠
第七集　　　雲尪
第八集　　　掛號
第九集　　　紅線
第十集　　　放送
第十一集　　柳枝
第十二集　　出磺
第十三集　　批信
第十四集　　骷髏
第十五集　　魯蛇
第十六集　　炸彈
第十七集　　地陷
第十八集　　Phe-Tshia
第十九集　　水燈
第二十集　　鴨仔
第二十一集　鬼厝
第二十二集　溪底
第二十三集　金光
第二十四集　欶管
第二十五集　捙拚
第二十六集　昏迷
第二十七集　飛天
第二十八集　地獄
第二十九集　臨界
第三十集　　日誌

踏話頭　挩窗去弄險
序　　開窗冒險去

第一集　　　蠟條
第二集　　　加薦
第三集　　　尾溜
第四集　　　打貓
第五集　　　茶鈷
第六集　　　珍珠
第七集　　　雲尪
第八集　　　掛號
第九集　　　紅線
第十集　　　放送
第十一集　　柳枝
第十二集　　出磺
第十三集　　批信
第十四集　　骷髏
第十五集　　魯蛇
第十六集　　炸彈
第十七集　　地陷
第十八集　　Phe-Tshia
第十九集　　水燈
第二十集　　鴨仔
第二十一集　鬼厝
第二十二集　溪底
第二十三集　金光
第二十四集　欶管
第二十五集　捙拚
第二十...