風吹：周蘇宗臺語詩（附QR Code線上音檔）

名人推薦：

來看伊這部冊
李恆德
專業台文寫作佮教學

熟似蘇宗兄嘛才這幾年的代誌爾
會記得彼年我咧寫《教典無的老台語》
一工一篇逐工囥fb 發表
伊上熱心逐工入來看
毋是干焦看爾爾
閣認真揤讚，留言贊聲鼓勵抑是提供意見予我參考指教

我總共寫604 篇
伊逐篇綴甲到無一篇交落
這个過程中間伊嘛捌來台北相揣
和我鬥陣食飯開講
彼工阮和另外一个文友鄭如絜三个開講三點外鐘
無所不至談
破腹來相見

予我發見伊真正是一个12 分熱情豪爽的查埔囝
嘛予我知影伊真濟足無簡單的工夫
頭一項彼陣伊今仔參加一个全國性的語文比賽
伊頭一擺參加就共提著社會組全國冠軍真正無簡單兼無天良

第二項伊毋但寫詩gâu，記持嘛非常驚人，會記得有一擺伊敲電話予我，講起著伊的詩，伊紲喙背幾若篇予我聽，每一篇攏是幾百字的長篇，伊一篇仔閣一篇背起來，每一篇攏溜喙出，無頓蹬，無跳針，無嚶嚶嗯嗯，無呧呧嘟嘟，聲喉閣迷人有磁性，無輸張宗榮黃俊雄，予我感覺伊無行這途真正拍損，是講伊若較早出世咧，閣行這途，張宗榮毋就免賺食矣啦！

尾仔伊的詩專集出版聽講伊不斷受邀請去介紹伊的詩，短短幾個月伊全國走透透，講幾若十場，每一場攏滿台受著熱情的歡迎，這是別人做袂到的。

第三項伊寫詩寫甲變出色的詩人，演講會當做一流的演說家，其實伊本途是投資，嘛已經是成功的投資企業家，閣較可怕的是伊竟然會當走ma-lá-sóng，雖然只有半馬，對伊這个年歲來講已經予我吐喙舌澈底佩服，表示伊有足堅強的意志才會當做啥物成啥物！

了後我的彼本《教典無的老台語》出版，伊真慷慨共我相當的贊助，超出一般人做會到的程度，予我十二分的感謝！

這回伊這本詩的專集欲出版承蒙伊無相棄嫌，叫我共寫文推薦，我一下手就允伊毋是交情的問題，是伊的詩確實寫了好，好甲百分之百值得我推薦！
(節錄)

天才型的詩人
路寒袖
詩人
第6、7 屆金曲獎最佳方言歌曲作詞人

我第一遍讀著周蘇宗的詩是〈斯卡羅戰歌〉，這首是第八屆教育部「閩客語文學獎──閩南語現代詩社會組」的參選作品，拄好我是評審，我誠佮意這首詩，當時我的意見是：（這首詩）寫的歷史事件是最近誠流行的公視連續劇，作者有用心做功課，是一首故事豐富、氣勢飽滇的史詩，「斯卡羅的血脈是用袂完的火炮／竹箭是驚天動地的機關銃」為本詩定調，「早起的雺霧是海洋咧悲傷吐大氣／欲暗仔的紅霞是天星墜落的血水」，這款詩句展現出作者的藝術性。誠歡喜這个看法得著其他評審委員的認同，所以〈斯卡羅戰歌〉得著第一名。佇我的心目中，這个作者會使講是詩壇內底的陳耀昌醫師。

講起來誠有緣，一段時間了後，有一工，我的好朋友臺語專家周美香教授專工送我一本伊的學員出版的詩集《觀音》，作者是周蘇宗，閣較重要是內底收入彼首〈斯卡羅戰歌〉，原來就是伊寫的。《觀音》是周蘇宗的第一本詩集，2022 年出版，上主要的主題是伊對阿母的思念，猶有伊佮佛法的因緣。其實周蘇宗的詩齡算短，2020 年年底才動筆，到今猶未滿四冬，就欲出版第二本詩集囉！跤手實在誠猛醒，伊佇《觀音》的〈自序〉寫講，開始寫詩的三個月內就寫欲三百首臺語詩，產量驚人，會使講是一个天才型的詩人；另外一方面，也會當看出伊若決定欲做的代誌，就會認真專心一直共拚落去。

這本《風吹》是以二十四節氣對立春寫到大寒，毋過無一定會用著每一个節氣的名稱來寫詩，譬如「立春」內底有兩首，一首是〈春訊〉，另外一首是〈溪頭雺霧〉，並無一首標題是〈立春〉的詩作。不而過像「驚蟄」，嘛是收兩首，一首就是〈驚蟄〉，另外一首是〈太平洋的風〉。

周蘇宗佇《風吹》猶原放袂落伊上數念的阿母，〈太平洋的風〉、〈阿母的新厝〉、〈小寒〉、〈冬節圓〉這幾首攏有阿母的影跡，〈太平洋的風〉內底的詩句：「鹹鹹的風是太平洋的氣味／袂輸番薯糜攪鹽的清芳」佮〈阿母，多謝你〉：「學生時代補習了後轉到阮兜／菜櫥仔內攏有一碗芳絳絳的鹹糜／頂面攏掖蔥仔珠花」（《觀音》，p.44），「鹹糜」是周蘇宗佮阿母上重要的聯結。其實予我上感動是：「阮毋敢放聲吼／恐驚傷過澹溼的目屎／會擾亂已經焦燥的所在／阮毋敢過頭想你／煩惱傷過沉重的思念／會硩歹墓園的植栽」（〈阿母的新厝〉）這兩小段。仝款是親情主題猶有寫阿爸的〈阿爸的跤踏車〉，寫外公的〈磨墨〉。

周蘇宗猶有一項誠特別的「特異功能」就是化用、轉譯別人的作品，像《止枵三寶》〈水餃〉、〈泡麵〉、〈炒飯〉和〈貨櫃情⸺讀路寒袖〈櫃情〉〉這兩首就是對我的情詩集《在門口罰站的天使》〈日常飲食三題〉和〈櫃情〉來的。〈風吹〉的靈感來自武雄老師的〈風吹，風吹〉；〈白露〉的根源是《詩經》〈秦風．蒹葭〉；〈臺語秘魔崖月夜〉真明顯是對胡適〈秘魔崖月夜〉而來。周蘇宗厲害的所在是伊袂受著原作的綑縛，會當誠輕可就吸收原作的營養分，脫胎換骨，生出屬於伊家己骨肉靈魂的作品。
(節錄)

熟似伊是佇一節台語作詞課
武雄
台灣歌詞業界的工匠職人
第23 屆金曲獎最佳作詞人

時間大概是舊年熱人彼跤兜，我接著一項任務，愛來去共一寡有興趣寫台語歌的朋友，分享我個人寫歌詞的經驗，地點是佇咧中正廟，暗頭仔行入去大廳，突然間有一種生份的感覺，才發現原來這角勢，過去我kan-na 去過國家音樂廳佮國家戲劇院爾，當初伊禁止咱講台語，如今頭一改行跤到，是為著欲教台語，真正感慨萬千。

彼工我有較早到，家私頭仔才撨好勢，就有一个人過來挨拶，我心內暗想講，啊這个看起來都佮我頂下歲á，閣遐有心專工報名來上課，結果一下手就㧣來一本冊，冊名《觀音》，是伊才出版的台語詩集，而且káng 無偌久就聽會出來，這缽的無簡單，毋但台語有研究，創作有成績，若親像對我嘛有相當的了解，害我心頭摵一下，這聲費氣矣，這sian 絕對歹剃頭。

規欉好好果然無錯，彼工了後，我就不時會收著蘇宗的「早安貼圖」，內容千變萬化，有世事的議論，有人情的描寫，有時是伊幼秀多情的作品，有時是對社會種種的批判，比論講有一改詩壇發生文抄公的糾紛，伊就三不五時傳來伊的分析，一張對照圖畫紅漆青，證據現拄現，按呢若毋是抄，啥物才叫做抄？

明明是一个對世事充滿熱情的詩人，一个對佛法有修為的居士，結果掰伊的面冊，又閣捎無摠，一工到暗都咧發股市行情，我想講機關藏咧倉庫，探聽才知，原來伊是英國伯明罕大學的財務碩士，像這款十八般武藝逐項捌透透ê，講伊歹剃頭，一點仔都無共枉屈。

今年作詞課仝款有開班，因為伊的熱情佮專才，蘇宗已經對學員變身做班上的台語顧問，上課進前仝款來相借問，你共看又閣來矣，伊講伊年底欲出新的詩集，央我寫一篇頭序，論真講來，寫詩佮寫歌雖罔攏是文字創作，不而過各有鋩角，手路完全無仝，結果伊講這本號名《風吹》，害我連推都毋知欲按怎推。

詩集以二十四節氣做篇章，伊用幼秀的心，將日子化做詩句，一首一首記錄歲月，描寫對生活的感想、對親人的思念、對土地的關懷、對時代的觀察，講著過去，伊會用心考證詳細註解，使用的字句是端的的台語，採用的是正字台文，篇尾特別收錄的，幼，幼甲用伊飼的狗仔描寫天生萬物的感情；大，大甲用一本冊描寫戰後台灣島嶼的歷史風貌，蘇宗所關心的世界，就是遮爾á 開闊。

蘇宗熱情海派好鬥陣，講伊歹剃頭是咧半滾笑，佇歌詞業界，普遍攏知影我對寫歌這項手藝的要求蓋龜毛，看伊對創作的頂真綿爛，其實有一種照鏡的心情，自古以來這个語言佇這片土地受盡苦毒，雖然過去這成十冬有小可仔改善，猶原是每踏一步攏予人百般刁難，親像蘇宗這款的用心用情，更加使人珍惜。