收藏
有夢，就有望
◎踏話頭
初初佮我接接、參我講話、對語言表達感受khah敏感的人，常在會問：「你哪會臺語講kah tsiah-nī-á輾轉，華語嘛講kah hiah順咧？」頭一kái予人按呢問的時，我足自然就ka應講：「因為阮爸母毋捌字，規世人干焦會曉講臺語爾；啊若講華語會捲舌，就愛感謝國校仔一、二年仔的老師教liáu好啦！」落尾，若閣拄著有人問我仝款的問題，我tsiâu按呢ka講。雖罔予人聽著感覺淡薄仔笑詼，煞是有九分真。
頭一回欲為家己的頭一本作品集──《火種／hué-tsíng》寫序文，一時間心肝頭有千言萬語，siáng知一禮拜過去矣，猶寫無半字！到底啥因由？思來想去嘛是捎無摠。
真知家己毋是一个天生文思ná泉水、創作力強又閣產量濟的「寫手」，人咧講：「頭上仔khah僫生」，確實有影to著！這正是本人生過三个查某囝的親身體驗。不而過，自1998年開始學臺語文、2002年二月開始佇國校仔教臺語、2008年開始用臺語寫散文、投稿……，到tann拄拄好二十冬tah-tah，才生出一本作品集，這應該毋是「僫生」，根本就是「難產」。
◎母語書寫是爸母生成的
2012年以〈思鄉偶書〉寫阮阿母的後頭厝、寫瑞里的茶芳，參加第三屆桃城文學獎的散文組的比賽，「好運」得著佳作──是唯一一篇臺語書寫的作品。（徵文作品包含：現代詩、散文、短篇小說。）是按怎講「好運」咧？佇遮小可仔說明：彼當陣的頒獎典禮，我無出席；幾工後，收著主辦單位郵寄來的作品集，掀開一下看，才知規本作品集獨獨我彼篇是用臺語書寫--ê。每一篇作品的文後，攏有附帶評審委員的評語，我真要緊嘛真要意家己的作品到底予評審寫啥意見？
散文組的評審委員其中一位是路寒袖老師，下面節錄伊的「評審意見」：
（以華語書寫，內容節錄自《第三屆 桃城文學獎得獎作品集》p99）
路寒袖：
能以台文書寫散文已屬不易，且本文已超越「只有台語而沒有文學」的層次，作者的美學架構已隱約成形，尤其寫泡茶那段，暗喻人生哲理，節奏分明，情味盎然，極具聲韻之美。
「評審意見」的內容，我相連紲看咧三、四遍。真正是好禮佳哉，去予路寒袖老師看著tsit篇文章；若無，毋知敢會tsua̋n-ne予電風吹去到壁角……。這，敢毋是不止仔「好運」咧！所以講，母語書寫是爸母生成、天公地道的代誌。也uì遮予我體會著「文學素養」對寫作的重要性。
◎積極參與研習，精進增能
2002年二月開始佇國校仔教臺語，仝年的熱天提著教育部彼張「國民中小學鄉土語言（閩南語）教學支援人員」檢定合格的證書，我tit个半路出家的笨桶師，tsua̋n-ne正式徛上教室的講台。知影家己真濟所在並無具備做一个「老師」的條件，所以長期以來，只要有任何佮臺語教學相關的研習課程，uì初階、進階、高階到教材編寫、設計，教材運用、教學策略佮技巧的核心素養，班級經營、教室管理，猶有文學講座、文學營……，我攏真積極參與研習，彌補家己的不足，提升家己的教學能力，向望家己成做一个正港的「臺語老師」。
◎寫演講搞，培訓選手
「你是按怎訓練選手--ê？」tsit个問題，逐不時to有人咧問我。其實，這毋是三兩句話就有才調講清楚--ê。上基本的就是：選手有意願（興趣）、家長有支持、學校有重視，三方面互相配合，指導老師才有法度出跤手；欲培訓一个選手到kah伊有本事徛上全國賽的演講台，絕對毋是三工五工的代誌；若是平常時仔厝裡有咧講臺語的囡仔，定著會khah贏面。
尤其是代表各縣市欲去拚全國賽的選手，逐个毋管是台風、儀態、語音、氣勢，攏嘛仁仁仁、一粒一的，隨个仔隨个輪流上全國賽的演講台，人人功夫盡展，互相咧大捙拚、比懸低，就是等欲戰出一个輸贏。終其尾會當拚入全國前六名--ê，「演講稿的內容」就是勝出的主要關鍵。所致，欲寫出一篇好的演講稿，相信是每一个指導老師上大的挑戰。
一、二十冬來，無論是指導演講、抑是朗讀的選手，uì國小、國中、指導到高中、教育大學……；自校內比到市賽，按市賽拚到全國賽，無一冬落勾去、舞無著--ê，選手的表現嘛tsiâu無落氣，這是我上大的安慰。
親像：
1、 指導臺南市北區大港國小學生許令萱，參加「107年全國語文競賽」國
小組閩南語演說，得著全國第三名。
2、 指導臺南大學學生顏郁珊，參加「105年全國語文競賽」教育大學及大學教育學院組閩南語朗讀，得著全國第二名。
3、 指導臺南大學學生顏郁珊，參加「104年全國語文競賽」教育大學及大學教育學院組閩南語演說，得著全國第四名。
4、 協助指導臺南市麻豆區麻豆國小學生黃胤恩，參加「103年全國語文競賽」國小組閩南語演說，得著全國第一名。
人講：「一牽成、二好運、三才情。」以上是近來tsit幾冬陪選手去拚全國賽的成果，「教學相長」──是選手的表現優秀，予咱綴咧有成就。
◎收話尾
「創作的文章捌著過文學獎，上無愛出過一本冊」──聽講這是成做一个「作家」的基本條件。感謝爸母話，感謝咱臺語文學界濟濟的先輩、教授、老師佮友志的牽教、支持佮鼓勵，感謝《海翁台語文學》、《臺江臺語文學》，遮--ê雜誌予拙作有發表的所在佮機會，閣khah愛感謝臺南市政府文化局佮2019年「臺南作家作品集」的評審委員共阮看重。「有夢，就有望」──行佇臺語寫作tsit條路，阮堅心的信念閣再加一分向望。（有加分）
母語書寫對我來講，是心靈敨放的藥引，是療傷上好的止疼劑。頭一kái出冊，定著猶有足濟注意無著、抑是稽考無夠的欠點，敬請各位先輩指正。十二萬分感謝！
──2019/7/10下晡定稿佇逸齋。
2024專利防護中